Tuesday, November 27, 2007

တန်ဆောင်တိုင် နောက်ဆက်တွဲ

မနေ့က ညဦးပိုင်းလောက်မှာ ကျွန်တော် အခမ်းအနား (၂)ခုကို မထင်မှတ်ဘဲ ရောက်ဖြစ်ခဲ့ ပါတယ်..

ပထမ တစ်ခုက တန်ဆောင်တိုင်ပွဲတော်မှာ တက်ကြွစွာ ပါဝင်ခဲ့ကြတဲ့ ကျောင်းသား၊ ကျောင်းသူတွေ၊ ဆရာ၊ ဆရာမတွေကို ဂုဏ်ပြုတဲ့ ပွဲနဲ့ စူဋ္ဌာမုနိဘုရားကို မီးပုံးပျံဖြင့် ပူဇော်လွှတ်တင်ပွဲ ဖြစ်ပါတယ်.. အဲ့ဒီပွဲက စူဋ္ဌာမုနိ ဘုရားကုန်းပေါ်မှာ လုပ်ခဲ့တာ ဖြစ်ပါတယ်..

၁၃၆၉ခုနှစ် တောင်ကြီးမြို့ တန်ဆောင်တိုင် ပွဲတော်ကြီး အောင်မြင်စွာ ကျင်းပနိုင်ခဲ့တဲ့ အတွက် အဲ့ဒီပွဲမှာ ပါဝင်ခဲ့ကြတဲ့ ကျောင်းသူ၊ ကျောင်းသားတွေ၊ ဆရာဆရာမတွေ၊ တာဝန်ရှိသူပေါင်း ၃၀၀၀ ကျော်ကို ကျေးဇူးတင် ဂုဏ်ပြုသောအားဖြင့် အနွေးထည်ဂျာကင် တစ်ယောက် တစ်ထည်စီ လက်ဆောင်အဖြစ် ပေးခဲ့တာ ဖြစ်ပါတယ်.. အဲ့ဒီပွဲမှာ ပေးအပ်ခဲ့တဲ့ အနွေးထည်တွေကို မူဆည်နယ်စပ် အထိ လူလွှတ်ပြီး သွားဝယ်ခိုင်းခဲ့တာလို့လဲ သိရပါတယ်.. ကျောင်းသားတွေ အတွက် အဆင်တစ်မျိုး၊ ကျောင်းသူတွေ အတွက် Design တစ်မျိုး၊ ဆရာ ဆရာမတွေအတွက် အရောက်တစ်မျိုးနဲ့ ခွဲခြားပြီး ပေးခဲ့ ပါတယ်.. ကျောင်းသူ၊ ကျောင်းသားတွေလဲ ပုံစံတူ အနွေးထည်လေးတွေ ၀တ်ပြီး ပျော်ရွှင်ကြည်နူး နေတာကို တွေ့ခဲ့ရပါတယ်..

အဲ့ဒီနောက်မှာတော့ စိန်နားပန် မီးပုံးပျံတစ်လုံး လွှတ်တင်ခဲ့ပါတယ်.. ဘုရားကုန်းပေါ်မှာ လေတော်တော်လေး တိုက်တဲ့အတွက် မှိုင်းခံအပြီးမှာ မီးပုံပျံ အောက်ပိုင်း ပြဲထွက်သွားပါတယ်.. ကုန်းပေါ်မှာ ကျောင်းသူ၊ ကျောင်းသားတွေ အပြည့် နေရာယူထားတာမို့ လွှတ်လို့မရရင် မလွှတ်ဖို့ တာဝန်ရှိသူတွေက တားပေမဲ့လဲ.. မီးဆရာတွေက မရအရ မဖြစ်ဖြစ်အောင် လက်စွမ်းပြသွားကြ ပါတယ်.. ပြဲသွားတဲ့ နေရာကြီးကို အသင့်ပါလာတဲ့ စရွက်စတွေ၊ ကော်တွေနဲ့ ပြန်ကပ်ပြီး အောင်အောင်မြင်မြင်ပဲ လွှတ်တင်နိုင်ခဲ့ပါတယ်.. သူတို့ကိုလဲ ဂုဏ်ပြုဆု အနေနဲ့ ၅၀၀၀၀ ချီးမြှင့်ခဲ့ပါတယ်.. အဲ့ဒီ မီးပုံးပျံကို မီးပုံးပျံအဖွဲ့က ညလုံးပေါက် ပြုလုပ်ခဲ့ရတယ်လို့လဲ သိရပါတယ်..

Camera မပါလာတဲ့အတွက် ကျွန်တော်လဲ Phone က Camera လေးနဲ့ပဲ ရိုက်ခဲ့လိုက်နိုင်ပါတယ်..



ဒုတိယ တစ်ခုကတော့ မြို့တော်ခန်းမမှာ ကျင်းပတဲ့ ဆုပေးပွဲနဲ့ ဂုဏ်ပြုညစာစားပွဲ ဖြစ်ပါတယ်.. အဲ့ဒီပွဲမှာ တန်ဆောင်တိုင်ပွဲတော် ပိတ်ပွဲမှာ ဆုပေးဖို့ ကျန်ရှိနေသေတဲ့.. ဓါတ်ပုံပြိုင်ပွဲနဲ့ သီချင်း အရေးအဆို ပြိုင်ပွဲတွေက ဆုတွေကို ပေးခဲ့ပါတယ်.. ဒါအပြင် တန်ဆောင်တိုင် ပွဲတော် အောင်မြင်အောင် ပါဝင်ကူညီ လုပ်ဆောင်ခဲ့ကြတဲ့ ကော်မတီတွေ၊ အဖွဲ့အစည်းတွေက လူတွေကို ဂုဏ်ပြုလက်ဆောင်တွေ ပေးခဲ့ပါတယ်..

အဲ့ဒီပွဲကို ဂျက်မြသောင်းနဲ့ ဒီဒီ တို့ရဲ့ တောင်ကြီး ထာဝရလှသော တန်ဆောင်တိုင် သီချင်းနဲ့ စတင်ခဲ့ပြီး တိုင်းရင်းသား ရိုးရာအကတွေအပြင် တန်ဆောင်တိုင် သီချင်း အရေး၊ အဆိုပြိုင်ပွဲမှာ ဆုရရှိတဲ့ သီချင်းတွေနဲ့လဲ ဖျော်ဖြေ တင်ဆက်ခဲ့ကြပါတယ်.. ရှမ်းဝတ်စုံ ကို့ရို့ကားယား ၀တ်ထားတဲ့ ဦးဂျက်ကလဲ တကယ်ပြောတာပါ သီချင်းနဲ့ သီဆိုဖျော်ဖြေခဲ့ပါတယ်..

အဲ့ဒီနောက် ပွဲကို တက်ရောက်လာကြတဲ့ ပရိတ်သတ်အားလုံးက ဦးဂျက်၊ အန်တီ ဒီဒီ (စိုင်းစိုင်းခမ်းလှိုင်ရဲ့ အဒေါ်ဖြစ်လို့ အန်တီလို့ သုံးလိုက်ပါတယ်..) တို့နဲ့အတူ ထာဝရလှသော တန်ဆောင်တိုင် သီချင်းကို ပါဝင်သီဆို ကခုံကြရင်း ပျော်ရွှင်စွာနဲ့ အဆုံးသတ်ခဲ့ပါတယ်..

No comments: